HISTORISCHE WERKGROEP LAND VAN K

*[ Door op de foto te klikken krijgt u een vergroting ]*

		[Blad 1 voorzijde] Kessel

	[Blad 1 rugzijde] Te weten den rijns gulden gerekent voir 20 stuver of 51½ kromstert ende den stuver voir 2½ kromstert ende 1 groitken ende 13 groitken voir eynen kromstert (los inliggend stuk) Item noch geboirt van der moelen ter Horst dat in mijne rekenscap nyet en steit 3 malder roggen. Des is eyn halff malder an zeeldoick, ½ malder enen smyt die die billen op ter moelen scherpt, om kerss(en) die men op ter moelen behoift 1½ vait roggen ende eynen knecht die die moelen verwairt 1½ malder 1 vait roggen, summa 3 malder roggen ende hyrmede sijn sij bewesen	[Blad 2 voorzijde] Dit is rekeninge ende bewijsinge mijns Arnoltz den Wilden van Mersen, dat ich opgeboirt ende ontfangen hebbe in den ampt slantz van Kessel ende ther Horst van renthen, van broicken ende van composicien van wegen ende bevele des hogebaeren doirluchtigen fursten hertogen van Gelre ende van Gulich ende greve van Zutphen, mijns genedigen alrelieffsten heren, angaende ende begonnen op Ons Liever Vrouwen dach Purificationis anno etc. (14)57 ende uitgaende bys des yrsten daigs aprille in den selven jair, die tijt is twee maent Opboeren primo van Kessel ende Helden, elck 5 mark ad 2 Arnhems gulden 1vlemsch ende voir den Aarnhems gulden 14 stuver Kessel ende Helden nyet Baerle Item Peter Wolter 5 marck Item Jenneken Brouwer 5 marck Blerich Item Jenneken Schut 5 marck Item Hoifftken 4 5 marck Zevenhem Item Kathrijn Duvels 2 5 marck Summa 9 5 marck, voir elcke 5 marck 29 vlemsch, 4 vlemsch voir 3 stuver, vz 9 rijns gulden 40 kromstert 6½ groet Composicie Item Zoemerman van Helden van penen 9 rijns gulden Item Thijs her Walravens gegolden den hoff tot Berchem ende hefft dair ander lant ende erve an gegeven. Van gewynne dair van geboirt 40 rijns gulden. Des die drossert 2 rijns gulden vz blijvens opgeboirt 38 rijns gulden Summa lateris 47 rijns gulden 40 kromstert 6½ groitken

	[Blad 2 rugzijde] Item Gairt van den Broick hadde hendelinge mit eynen geheiten Jenneken Schroeder tot Brede, dairomme ich hem mitten recht ainsath, die gededingt ende gescheiden mit 11 rijns gulden. Des heb ich 1 gulden int gelaich, vz blijvens opgeboirt 9 rijns gulden Item Geritken van Holthuysen hadde tot Blerich eyn ongevall. Dat gescheiden mit 19 Arnhems gulden, des heb ich eynen gulden, vz blijvens opgeboirt 18 Arnhems gulden ad 14 vlemsch, vz 9 rijns gulden 23 kromstert 2½ groitken Summa dat ich geboirt hebbe gelijck vurs. steet 66 rijns gulden 12 kromstert 2½ groitken Item Goissen Brouwer tot Kessell die sich wat in den gericht tot Kessel ver kaldt hadde, den scepenen aintreffende. Dairomme ich dinckplichtich mitten lantscepenen geweest byn, soe dat hij gescheiden is ende gededingt heefft ende sall voiruit avermitz den scepenen allen onkost die dairop gegain is betalen ende sall dairtoe geven 67 rijns gulden. Dair geet wederomme aff dat die scepenen voir hoere voirspreckgelt ende onkost hebn soilen 10 rijns gulden, ich selver 2 rijns gulden, mijnen knechteren 2 rijns gulden ende tot Venloe soe men dat dair gescheiden solde hebn, dat achter bleeff te gelage gegolden, dat dair op gesat wairt 3 rijns gulden, vz blijvens opgeboirt dat Goisken nu te Belaicken Paisschen tot behoeff mijns genedigen lieven heren betalen sall vijfftich rijns gulden	[Blad 3 voorzijde] Item Jenken van Dijck had eynen sack tot Soevenhem op ter moelen staen ende quam op die moelen ende die molner had eyns anderen mans meel dairin gedain, soe schodde Jenken vurs. des anderen mans mele uit den sack ende sacht wen des boven meel in sijnen sack queme, des ich hem mitten rechten ainsach. Dat gededingt ende Jenken sal nu te Belaicken Paisschen dairvan geven ende betalen 24 rijns gulden. Des heb ich 2 gulden, mijne knapen 1 rijns gulden ende int gelaech 1 rijns gulden vz blijvens dat men opboeren sall 20 rijns gulden Summa des men hyraff noch opboeren ende ontfangen sall 70 Rijns gulden Item noch van der moelen ter Horst opboirt 8 malder roggen, des geet wederomme aff 2 summeren, die die 4 oirden jairlix te hebn plegen als dat gewoenlich is, vz blijvens 7 malder 1 summeren roggen, 't malder 1½ rijns gulden, vz 11 rijns gulden Item noch ontfangen 5 malder maltz ad 13 stuver Item 8 vait boickweytz, 't malder 12 stuver Summa van der molen 15 rijns gulden 2 kromstert 7½ groitken Summa summarum van allen opboeren ende dat men noch opboeren sall, tsamen gelijck vurs. steit 151 rijns gulden 14 kromstert 10 groitken

	[Blad 3 rugzijde] Uytgeven Arntz vurs. Item in den yrsten des satersdaiges na Onser Liever Vrouwendach Purificationis van bevele brieven mijns genedigen heren gereden mit mijnre rekenscappen tot Grave die ich doe dede, mit 3 peerden 6 daige dair gelegen, sdaiges 1½ klynckert vz 6 rijns gulden 38 kromstert 9½ groitken Item des satersdaiges na Sente Mathijs dach van bevele des marschalcks ende des coeckemeisters gereden tot Gelre ende was dair 3 daige mit 3 peerden, sdaiges 1½ klynckert vz 3 rijns gulden 19 kromstert 4 groitken Item des vrijdaiges post Invocavit gereden van bevele brieven mijns genedigen heren tot Gelre mit 3 peerden, gehadt soe hij terstont wederomme reet 3 mailtijden ad 1 stuver 2 groitken, wijns ad 2 vlemsch, 3 vait haveren ad 1 vlemsch, vervaeren 2 vlemsch. Summa 25 kromstert 1½ groitken Item van bevele brieven mijns genedigen heren den coeckemeister gedaen 10 rijns gulden Item op Sunte Mathijsavont deden mijns heren gnaden mij schrijven sijnre gnaden ter Horst doin bereiden ende sijne gnaden en quamen nyet dan sijnre gnaden huysgesynne quamen tsamen dair. Per den coeckenmeister verdain ende gerekent gelijck die partes hyrbij dat uitwijsen 36 rijns gulden 4 kromstert Item eynen geheiten Peter Kremer die gestalen heefft, den selven doin richten ende die scarprichter was tot Gelre den ich mit mij ter Horst nam, dair gewest 2 nacht, verteert 6 stuver ende voir sijn loen 4 Arnhems gulden 10 vlemsch ende eynen baide hem mitgegeven die hem tot Ttriecht? leiden 9 vlemsch. Ende 3 holter gekofft tot Venloe omme eyn galge dairaff te maicken 6 stuver ende eynen tymmerman die die galge maickten 2 vlemsch ende eynen die hem sijn byget? hoirden 2 vlemsch, om zeel ende hansen 4 vlemsch vz 3 rijns gulden 36 kromstert 9 groitken Summa lateris 60 rijns gulden 20 kromstert 10 groitken	[Blad 4 voorzijde] Item die selve Peter Kremer geseten ter Horst eir ich eynen scharprichter krijgen konde, soe ich tot Nijmegen dairomme gesant hadde ende des nyet krijgen en konde 28 dage, sdages voir sijnen cost 2 stuver, vz 2 rijns gulden 41 kromstert 3 groitken Item soe Holtacker van der Horst ter Horst in den gevenckenisse geseten hefft 12 weken, soe quamen sijne vrienden ende verborghden hem eyn tijt lanck avermitz scepenen in maten dat hij sich mit sijnen vrienden bespreken ende dedingen solde. Wert saicke dat hij bynnen der tijt nyet en dedingden soe solde hij in komen ende en quame hij nyet in solde hij vervallen sijn bij eyne pene van 100 rijns gulden tot behoiff mijns genedigen heren. Dair sijne gebreck gevallen is ende were ich ain den ampt bleven en versette ich mij anders nyet dan hij mijnen genedigen heren die 100 gulden vervallen weren, soe ich die achtinge reken van den vurg. 12 weken, ter weken eynen klynckert vz 9 rijns gulden Item Oze van der Hautert hefft mitten scepenen van Wansem eyn swair stuck te doin, dairomme Oze vurs. in mijns genedigen heren gevenckenisse ter Horst quam ende hefft burgen avermitz scepenen van der Horst gesat ende dach genomen in maten als die scepenen weten ende hefft oir attinge selver betailt, dairomme ich hyrvan nyet en reken Item Seger Borwater hadde hendelinge tot Zevenhem gehadt, dairomme ich den antasten ende ther Horst bracht, die verborcht hefft te lijden des der scepen voir recht wijst ende dess yrsten vondenisse mitten lesten te staen Item soe ich mijnen genedigen heren die asscise ter Horst in mijnre laitster rekeninge voll gerekent heb, soe ontbrack mij dairain ain Heyne in die Vlesch 1 rijns gulden 5 stuver Summa lateris 13 rijns gulden 2 kromstert 8 groitken

	[Blad 4 rugzijde] Item Arnt Tymmerman 6 daige getymmert ain der molen ther Horst, des gilt mijn genedigen heren tot sijnen deel 3 dage, sdages voir loen ende kost 8 vlemsch, vz 24 kromstert Item gegolden 75 voit droger eycken plancken die vynsteren ain den koecken ende andere dairmede te maicken, der ich in mijnre laitster rekenscap nyet gerekent en heb, costen tsamen 9 stuver vz 23 kromstert 2½ groitken Item heb ich Peter van Holt gegeven 1 rijns gulden vanwegen Johans sijns broeder die tot Vreden doit bleeff want elck van mijns genedigen heren schutten 1 gulden hadde Item soe ich mijnen lieven genedigen heren gerekent heb ain zeeldoicken 1 malder roggen sijn dair ain gewest 2 malder roggen, soe reken ich mijnen genedigen heren dat sijnen genaden geboirt te gelden ½ malder roggen, vz 34 kromstert 10½ groitken Item soe gyfft mij mijn genedige here des jairs van den huyse ter Horst ende van den ampt slantz van Kessel 100 rijns gulden. Soe heb ich dat verwairt van Onss Liever Vrouwen daige Lichtmisse bys der yrsten dage Aprille, soe beloipt die somme na beloip des tijtz 16 rijns gulden 34 kromstert Item desgelijcken van der poirter des jairs 21 rijns gulden. Soe beloipt die somme van den twe maenden 3 rijns gulden 25 kromstert 10 groitken Item soe gyfft mijn genedige lieve here mij van den scholtetampt te bewaeren des jairs 60 rijns gulden. Soe heb ich dat verwairt die vurs. twe maende lanck, loipt die somme na beloip des tijtz 10 rijns gulden Summa lateris 32 rijns gulden 42 kromstert 9 groitken	[Blad 5 voorzijde] Item noch desgelijx gyfft mijn lieve genedige here mij des jairs 60 malder haveren, die 2 malder gerekent voir eynen klynckert, soe beloipt die somme na beloip des tijtz 10 malder haveren, maickt 3 rijns gulden 38 kromstert 9½ groitken Item Derich van der Horst gedaen 500 rijns gulden, die ich te schaden geworven heb. Dairvan reken ich van 15 gulden eynen des jairs, soe beloipt die somme na beloip des tijtz van den tween maenden 5 rijns gulden 28 kromstert 5 groitken Summa lateris 9 rijns gulden 15 kromstert 7 groitken Summa summarum van allen uitgeven vurs. loipt tsamen 115 rijns gulden 30 kromstert 1½ groitken Op- ende affgeslagen dat opboeren tegen dat uitgeven, soe beloipt dat opboeren meir dan dat uitgeven 35 rijns gulden 36 kromstert 2 groitken Te weten soe Dierick van der Horst Arnt die Wilde van Mersen nu uiter den ampten tot Kessel ende ter Horst geloist heefft, dat hem die voirs. 35 rijns gulden 36 kromstert ende 2 groitken an sijnen summen afgekurt sijn ende alsulke 8 rijns gulden als Arnt geboirt heefft van Hutman tot Rade die sal hij behalden voir sijn rijden ende teringe hij nu omme sijne rekenscappen te doin verteert heefft ende alsus en blijfft mijn gene dige Arnt noch oich Arnt mijns heren genaden van den ampten na inhalt sijnre rekenscappen noch oich in brieven op die ampten nyet sculdich Et hec computatio audita est in Gravia per dominum ducem presentibus de consilio domino Wilhelmo de Vlodorp advocato hereditario Ruremundense milite, marschalko Arnoldo de Goir necnon Gerardo Greve anno domini 1457 sabbato post Oculi