PACHTCONTRACT MARIS 1579

door Jacques Rutten.                                                          (RAL, Mariaweide, inv nr 468)  

tekst in blauw geeft links aan naar onderliggende bladzijden

	klik op de foto's voor een vergroting
	MARISPRIVATE , Pachtcontract 1579   In den naem ons Heere Amen, conditien, furwaerden, wij middelen, also die pr, mater, ende procuraester inder tijt,­vnde nae beschreve inden name, ende vanweghe des convents vande elffduysent meechden ghenaempt inden weyde binnen Venlo ghelege, tho halfscap vuytghegheven hebben, te winnen, bouwen, ende tho teelen, hooeren hoff, ende goet, Groot Maris ghenaempt, inden kerspel van Helden hoorende, Dirck vanden Ven, ende Anna zijn huysvrouw, tho nutte in onser beyde behoeff, acht jaren lanck, t­en  halver tijt nochtans op te segghen, ontrent die heylighe Kersmis daeghe, dair dat eerste jair af weesen sal dat jair van LXXIX. Ende sullen alle beesten op ten hoff halff ende halff zijn, ende Dirck voorsz sal den hoff besayen, buyten des cloosters toedoen, en sal alle dat lant, met mijten daer op ghemaickt hebben, wel ghemist voor sinte Remissemis, ofte weynich tijts dair nae. Item hij sal halden tweehondert scapen, ende niet min, ende vindmen meer scapen opt vierendeel, als vijffe, die sal dat clooster nae sich moeghen neemen, onbecroont van ymants. Item Dirck en sal gheen scaper myden, dan met rade des paters. Item hij sal oock halden XXIX ofte XXX stuck hoorende beesten, eer meer dan min,als te weeten dry paer ossen, ende VII ofte VIII kuyen. Ende sal oock halden een breeme, acht ofte thyen verckens jairlicx te deylen. Ende elcke party, sal totten verckenskooren bij legghen vier tzumeren bouckweyts, ende Dirck en sal gheen beesten opsetten te mesten, dan met raet des convents,veel ofte weynich, nae datmen  cruyt heeft. Ende soe wat kuyen dat men mest, die en sal men niet melcken. Ende daermen dat mestquick opten tuyer set, daer en sal men gheen ander beesten bij setten. Item Dirck en sal gheenderhande beesten buy­ten coopen ofte vercoopen, sonder des convents voorweeten ofte consent. Item die beesten diemen deelen sullen, salmen op zijn alderghelycxte setten, ende dat clooster sal kyesen, sonder eenich ghelt dair opte setten, ende soe wan- neer dat clooster hair deel wech heeft, soe sal Dirck sijn deel mede binnen twee ofte dry daghen slaen ofte verthien. Item Dirck sal gheholden sijn op sijn costen ende moyten, ons kooren, ende al dat ons dair te deelen valt, tho brenghen ende tho fueren met zijn naeghebuyren, op onse moelen tho Bleerick. Des sal procuratrix hem dair bestellen, een vaetken byers, ende wat eetens. Item sal oock ander dinghen, die hem den pater ofte den convent ansendt, brenghen ende fueren, dair hair luyden sulcx van doen heeft. Item men sal neemen XIIII vimmen koorens, niet vanden besten noch vanden snooesten, van beyde deelen, niet te dorssen voor hair selfs eeten, mer om die beesten tsamen tho onderhol­den ende tho voederen. Hier voor sal Dirck voorsz den clooster alle jairs vijff ofte ses vimmen gueden schooven leveren, voorts sal hij vuytten anderen stroy al soe veel schooven scudden vnde maken, alst hem eenichsins moeghelick is, holdende dat stroy te raden, ende spreecken die heyde te meer an, op dat den hoff in guede gedreven dack onderholden magh worden. Ende ist datter eenighe schooven overbliven, die sal men ghelyck deelen, ofte vercoopen,tot pfijt (=profijt) ons beyden. Item den halffenaer sal den decker te eeten gheven, ende opperen. Insgh­elijck  sal hij alle ons werck luyden te eeten gheven, vuytghescheyden, oft cloos­ter eenich nieu werck maeckte, dat langher duyrde dan vii ofte viii daghen. Ende ist noot met sijn ghesinne to helpen, dat sal hij den con­vent niet weygheren, Item des Paesschens sal hij den convent gheven III C eyeren, ende voor molkenghelt vii daelders, dry paer capuynen, ij smael hoenderen, een paer ghemeste ganzen. Item ij vette lammeren, ongheschooren, een vette kyshamel ongheschoor­en. Item dat groen, sal ons beyder beesten eeten, Item Dirck sal oock twee stercke hey meesters holden door dat iair. Item Dirck en sal gheen opgaend holt houwen, noch snoyen, noch gheen holts sich onderwinden. Item als Dirck af varen sal, soe sal hij iij morghen braecken, ende die graven ende wallen wel opgraven laten, ende die wenden in guede ghereeck holden ende laten. Item dat kooren salmen op ten velden deelen, ende Dirck sal die helfft alleyn nae sich neemen. Item hij en sal gheen kooren mayen, plucken, noch vuyt eeren,dan met convents believen. Item hij en sal oock gheen kooren inde schuren fueren, het tsy eerst van des cloosters weghen ghetelt. Item soe wat beesten hij vercoopt, sal dat clooster hebben voor een ander, Item soe wanneer dat clooster dorsschen wil, soe sal Dirck dair teghen dorsschen, mer gheen dorschloon hebben * (*HIER staat in de kantlijn:Item van dat spaenloon, daer sal dat convent niet of gheven) Item sal des jairs optrecken, ofte opvoeden te minsten vi cal- veren, Item van scattinghe, dingtael ofte brantscat, sal Dirck afdoen ghelyck ander Rumuntsche ofte Venloosche hooven dairgheleghen. Item het is oock vurwairdt datmen Dircken een halff boener morghe lants voor hem selven sal doen, tot vooerlant. Sonder alle arghelist. Ende tot meerder kennisse en waerheyt, zijn hier twee cedullen af ghemaeckt, alleens luydende. Hier zijn bij ende over gheweest, voor ons beyde partij als ghetuyghen, die froome Gherrit up den Linch, ende Dirck Goemans van conventsweeghen, ende ter ander zyde Leentken Mollers ende Gherut Korver.  Actum in den jair ons heeren duysent vijff hondert tseventich negen, daeghs nae Sinte Servaes   ondertekening: Heere Faes Jansen Bruyn, pr (pater) inghen Weyde binnen Venlo, Geryt Zybertz W Lenart Smollers