| | - Testament van Jan Jansen.
-
Inden name Goedes ende der helyghe Dryveuldichheyt Amen. Keundt ende kennelijck sye een jeder openbar die dyt dockument van testament sall syen ofte hoeren leesen saluit. Doen te weeten dat Jan Jansen is kranck van lycham, maer by goeder memory ende goede verstande. Soo wanner hy coemt te sterven soo beveelt hy syn seell Godt almachtych ende syn lycham der gewydder erden tot Helden. Wyders is hy dysponirende van syne tytelycke guederen, soo dyt synde synen wttersten wylle. Soo is hy noch hebbende met syne huisvrou
Dyrysken sevenhondert gulden. Soo door beliven van dese eheluiden voorss soo sullen voorss pennynghen wttgeset worden op intrest ende by alldyen Jan comt te sterven soo sall Dirisken van voorss pennynghen trecken den intrest. Ende die hoft som sall bliven aen haer kinderen die sye eheluiden onder haer beyden hebben verweckt. Ende by aldyen datter rinte verderff coemt, ende Dyrysken nyet wyder en is heertrout, ende can nyet wyder comen, soo woort tuy gestaen voorss pennynghen aen te vanghen. Dyt geschyet synde door beliven van dese eheluiden voorss ende in presenty Marcylys Selen ende Wilm Jaecken schepen des kerspels Helden. Ende hebbe deses met eyghener hant onderschreven, 1674 den 27 july. - Wilm Jaecken
| |