Op huiden den 20 augustus anno 1668 is een vrintelyck ackoert geschyet tussen den erbaeren ende vromen Peter Heynen, alias van den Culen, van wegen syne voorkynderen ende naekinder, die welcke Peter voorss heeft verweckt in die erste ehe ende twede ehe, dat die voorss kynderen sullen wesen gelycke kinderen naer doet van Peter Heynen voorss in Peter Heynen eerffguderen ende gereyde guderen, die guederen gelyckerhant te deylen, gelyeck dan offte sy van ennen vader ende moeder geboren waeren. Dan is geconsentyrt dat die dochter Bylleken sall veur wtt hebben hondert ende vyefftich gulden rormontscher wyrrongh. Noch is gedyttionirt dat die naekynder Toenys en Jacop sullen veur wtt hebben ieder een kuy ende vyer schaepen ende by soo veurren dat Tonis voorss quaem te sterven sonder lyffs erven soo sall Itten sijne huisvrou staen die guederen van synent weegen moegen te gebruycken soo langh Itten sall leven, volgens die lantrechten. Ende des is Jan Hoechtens ende Peterken Ingels mommer ende gedaecht door den rychterboede ende haren eeydt gedaen soo recht voor die nargelaten kynderen van wylen Hencken Heynen ende Cataryna Ingels salyger. Noch is gedaecht door den rychterboede Hencken van Nynis alias Jaecken, ende sijnen eeydt gedaen soo recht, en is mommer geworden voor die kinderen van Jacop Heynen ende Encken Stocx saliger. Noch is mommer geworden Lennart Smollers, schepen des kerspels Helden, voor Bylleken Peter Heynen doechter vs syn dochter. Ende des is Peter Heynen gelovende voor allen die genigen die welcke dyt sullen onderteyckent hebben, by aldyen Baetsken syn teghe wordighe huisvrou quaem te sterven voor hem selven, soo beloefft Peter VS syech nyet meer te bestaden aen jonghe vrouweluiden die welcke vruchten sooude voorts bringhen. In warder orkeundt hebbe ick Peter Heynen voorss desen met myne kynderen ende die voorss mommers ende Lennart Smollers ende Wilm Jaecken, schepenen des gerychs Kessell ende Helden, hyer toe geroepen, ende hebben dyt met eygenerhant ende hantmerck onderschreven op daech en datum voorss.