New Page 1

Inden name Goedes ende der heylyghe Dryfeulddycheyt sy een jeder kennelyck ende openbaer wy dyt document van testament sy oder voorcoimen wert als dat op huyden, den 20 daech des maendts october 1666, is kranck van lychaem befunden Tysken Nylys, ligghende onder helyghe sacramenten der heligher kercken, berycht synde door den erwerdighen pater Bloem, wesende in name ende van weghen onsen heer pastor, doech Tys voorss by gueder memory ende verstande, bedinckende dye swaeckheyt des menschelycken geslaechs ende dye seckerheyt des doets ende dye unseckerheyt dye ure, ende heft der wegen gedisponirt van hare tydelycke guderen, ende dat op haren wttersten wyll van testament gemaeckt, gelyck sy duet crafft deses, in forma ende mannyre als folcht. Inden ersten wanner seell ende lycham gescheyden is befeelt sy haer seell Godtt almachtych ende haer lycham der gewydder erden tot Helden. Widers gedysponirt van hare tydelicke guderen naer haren well gevallen, soo ghyefft ende maeckt sy testatryce op het aen bringhen pater Bloem voorss ende Maes van Knippenberch ende Lennart Nessen, Peter Coelen ende Peter Syllen ende pater Bloem ende Maes van Knippenberch voorss op het aen bringhen Lennart Smoll[ers] Wilm Jaecken, schepen des gerychs Kessell ende Helden, aen ons gedaen sinde door den erwerdighen pater ende Maes voorss. Inden ersten gyefft ende maeckt sy testatrice aen haren eygen soeen die welcke sy testatryce voorss met Jan Cremers verworven heeft, te weten gyft ende maeckt sy haeren soeen voorss 150 gl op hare eerfftall dye welcke sy tot Helden onder den clockenslach heft, ende dat voorss gelt gheeft sy haren soen voorss tot een elmys. Noch ghyefft ende maeckt sy haren soen voorss alle haere gereyde guderen van bedden, kyest ende kast, voorts van alles gereyde guderen dye welcke haer toe behoeren. Dyt is van null ende nullyteyt. Dese gyefft begert dese testatryse van werden ende geobservirt te hebben naer het aeffsterven van haer selver.