In den naeme Goedes ende der helyghe Dryfeuldicheyt sy een jeder kennelyck ende openbaer wy dyt doecument van testament sy oder voercomen weert, als dat op huyden den 21 feub[ruari] anno 1665 is kranck van lychaem befonden Heeyll Stammen, lygghende onder die helyghe sacramenten der helygher kercken, berycht synde doer Johannys Bysschoeps Vycarius ende cappellaen tot Helden, doech by goeder memoryen ende verstaende, bedynckende dye swaeckheyt des menschelycken geslaechs ende dye seeckerheyt des doets ende dye onseckerheyt die uhure; ende heeft der weeghen gedysponyert van haere tydelycke guederen, ende dat op haeren wttersten wylle van testament gemaeckt gelyeck sy duet craft deses, in forma ende maenyeren als voelcht. Inden ersten wanner seell ende lychaem gescheyden sall syn befeelt sy haer seell Godt almachtych ende die gebenedytter moeder Goets ende alle lyeve Goets heylyghen, ende haer lychaem der gewydder eerden tot Helden. Wyders gedyspoenyert van haere tydelycke guederen naer heuren well gevallen, soo ghyefft ende maeckt sy testatryce, voor ons Lennaert Smollers, Syellys Seelen schepen des gerychs Kessel ende Helden, inden eersten ghyefft ende maeckt sy testatryce vs haeren soen Peter ens voor all feur wtt het gerey een kuy beest met een wyt hoefft ende een bedde met haer toe behoer, te weten haer eyghen bedde daer sy den mesten tyt op gereust heeft. Noch ghyefft ende maeckt sy testatryce vs haeren soen Peter vs het perts getou met die karren, pluych, echt, ende voert wat men tot bouwen behuefft te hebben. Noch ghyefft ende maekt sy testatryce voorss haren soeen voorss die meerest van het gerey te weten het haelff gerey feur wtt, ende dye ander helfft met haeren soeen Arten wyderom met te deylen. Noch ghyefft ende maeckt sy testatryce voorss haeren soeen Peteren vs het ghelt het 'twelck Hendrick Bysschoeps haer scheuldych is van verkoechte schaep. Noch ghyefft ende maeckt sy testatryce haren soen Peteren voorss het ghelt het 'twelck haer Tys Grytters schuldych is, heercomende van vkoechte schaepen. Noch ghyefft ende maeckt sy testatryce haeren soeen Peter het ghelt het 'twelck haer scheulddych is Jacop Peter Heynen soen, heercommende van verkoechte schaepen. (In de marge: noch ghyefft sy testatryce haren soen Peter vorss een steuck gelts van acht rycx daller ungefeer, lygghen[de] in haer kyest, voor syn gaen ende staen voor haer gedaen.) Dese ghyefft begheert sy testatryce geobbseervyrt ende van werden ghehalden te hebben, soo well in het op comen van haere kranckheyt als in het sterven, nu ende alle tijett, sonder iemaents ietwets daerteghen te duen. Dyt hyer boeven gheschreven is allsoo gepassyrt in presensy Lennart Smollers ende Sylys Seelen voorss. In waerder orkundt hebben wy voorss schepen dyt dockument van testament met eygener handt underteyckent, op daech ende datum als voorss.

Lenaert Smollers

Sylken Seelen