| | - Testament van Jan van Inckevoort.
- Inden naeme der heylyghe Dryfeuldicheyt. Sy kundt ende kennelyck een jederen openbaer dat op huiden den 27 apryllys anno 1665 heeft Jan van Inckenvoert syn testament gemaeckt op het aenbringhen van Jacop Roesen ende Inghell Aenghen Indt aen ons gedaen. Lennart Smollers ende Syllcken Selen schepen des gerychs Kessell ende Hellden op het erstelyck verseuck syech verfeucht tot syne woeenstede van voorss testemaenteur, allwaer wy dese voorss Jan van Inckevoort hebben bevonden, kranck van lychaem ende berycht synde doer den erwerdyghen heer pater Pepers, edoech syns verstans soo waell wy hebben kunnen vernymen durch wtt machtych bevoenden, soo well wy hebben kunnen vernymen. Inden ersten alls syn seell ende lychaem gescheyden is beveellt hyj testateur syjn seell Godt allmachtych ende die gebennedyder moeder Goets ende alle lyve Goets heylyghen ende syn lychaem der gewyder erden tot Helden. Daer met sijn aeffsterven gheen dyspuyt offte geschyell en meucht coemen van iemanden van desen volghende der wyse der weghe van testament codyssylle offte anderen wttersten wylle rechtens gedysponyrt ende gedysposyrt ende geordenyrt als voelcht. Legatyrt ende ordenyrt gyeft ende maeckt in kraefft deses testament aen haer vyer kynder Beell, Besten, Merry ende Jan het gerey soo hy deser tyet is besyttende. Noch gyfft ende maeckt ende ordynyert hy testaeteur dat jeder kyndt dye aen syne eerffguderen seullen deelen dat jeder kyndt sall geven aen het naer gelaeten kyndt van Hencken Bestens salygher geheten Maes, jeder hondert gulden. Dyt all soo gepassyrt.
Noch is versproecken ende geordenyrt dat dyt voorss geltt het welcke desen VS Maes gegeven is, dat hij dat selve gelt nyet en maech verbringhen aen iemants vremder. Dyt all soo gepassyertt sall syn naer het affsterven deser testamenteur. Vermeugh den Gelderse Reformatyoen te testyren te dysponyrren mechtich is. Dyt all soo gepassyrt is in der forma ende gestaelt synde verclaert desen voorss testateur dyt haren ende synen lesten wille ende testament te syn, het welcke hy testateur naer synen doedt begert geobservyrt te hebben. In orkundt der waerheyt hebben wy voorss schepen dyt testament met eyghener handt onderteyckent op daech ende datum als boeven;ende voorss pater ende getuygen Jacop Roesen ende Ingell VS onderteyckent - fr Joannes Pepermans vice pastor
- Lenaert Smollers
- Sylken Selen
;- Jacop Rosen
- Ingel Aengen Eyndt
| |