Inden naeme Goedes ende der helyghe Dryveuldicheyt amen. Sy een jeder kennelyck wy dyt document van testament sy oder voor comen weert als dat op huyden den 6 feub. 1665, doer het aenbringhen den erwerdyghen pater Pepers, teghenwordych onsen heer pastoer, ende Jacob Grauwen ende Tyes Roesen, Tilmen vanden Beerch synde kranck van lychaem ligghende under die helygghe sacramenten der helygher kercken, doech by guede verstande, bedinckende die swaeckheyt des menschelycken gheslaechs ende die seckerheyt des doets ende die unseckerheyt die uhure, ende heefft derweeghen gedysponyert, synen wttersten wyll van testament gemaeckt, gelyck hy duet crafft deses in forma ende mannyeren als voelcht. Inden eersten wanner seell ende lychaem gescheyden is beveelt hy testatur syn seell Godt almachtych ende synder gebenedyder moeder Goedts ende alle lyve Goets helighen ende syn lychaem der gewydder erden tot Helden. Widers gedisponyert van syne tydelycke guederen te disponiren naer synen well ghevallen,  soo ghyefft ende maeckt hy testateur het kyndt van syn dochter Jaecken saly[ger] tot een elmys te weten hondert gulden, te seucken op den eerffgrundt van Tilmen voorss. Noch ghyefft hy testateur aen Jaecken sal[iger] kindt voorss het bedde ende een kyest met het gheene daer in is, dat Jaecken Saly[ger] toe waes in haeren leven. Ende Jaecken clederen dye sy was hebbende. Dese ghyefft begheert hy testaeteur geobservyrt ende underhalden te hebben, soo well in syn gesondtheyt als in syn sterven. Dyt is allsoo gepassyrt voor ons Lennart Smollers ende Wilm Jaecken, schepen des gerychs Kessell ende Helden. In waerder orkundt hebben wy voorss schepen dyt met eyghener handt underteckent, daech ende datum als boeven.