Donatie Mercken Verlinden.

Wir Marten Guemans Gerat Verhaech, schepen des gerichts van Kessel ende Helden, Wilhelm van Knippenberch richter boedt, duen hy met kundt und te weten hy met ende in kraft deses, dat voer uns schepen ende richterboedt in eigenner persoenen erschenen ende gecomparirt is Mercken Verlinden, weduwe van salig[er] Gardt Brummens, omtrint alt siende 80 jaer, ende heft met haeren gekoren mombar Tys Verhaech voer uns schepen vurss verclaert ende vuyt gesproecken, opten 22 daech Marty 1632, ende is vuyt gegaen op vryer heren straeten ungedronghen ungedwunghen, unverleit van jemantzs, gesont van lichaem, etende ende drinckende, ende heft met haeren gansen vryen wille, soe sy deser tyt wael mechtich is ende met recht wael duen maech, wie sy dan geneicht is vuyt gruntz haers hertsen, met vryen eighen wil haere eighen patrimoniael guederen ewech toe geven, den genighen den sy dat selvighe vergunt heft. Soe isset dat sy gieft ende maeckt erflick ende ewichlick, gieft ende maeckt mitz desen Johan Jans soen vanden Bos ende Trincken sine huisfrou ende huenen rechten erven, nemlick alle haere eighen patrimoniael guederen, soe haer van vader ende moeder nhae gelaeten ende verbleven syn, soe huys ende hoff, lant ende sant, benden, holtgewas, alsoe dat selvighe erf ende guet geleghen is inden kerspel van Helden inder hertschappen van Paninghen, nergens van vuyt gescheiden. Welcke vurss gift Jan vurss van Mercken sijn muen geacceptiert ende ahen genomen heft ende opheldingh bij den lant heer te duen vanden vurss erf, waerop ende ahen Mercken vurss dess alsoe ganss ende geheel vuyt gegaen is, ende haer selver daer van underft heft ende Jannen vurss ende sine huisfrou vergl daer ingesat ende gestalt, geërft ende geguet, allet nhae den gewoenlicken lant- ende banck rechten volgens der Reformatien. Waer voer Jan vurss siner muenen beloeft heft ende beloeft mitz diesen dat hy siener muenen Mercken beloeft alle die daeghen haeres levens erlick ende froem onderhalden sael in gueden kost van eten ende drincken ende sael haer wachten ende warden in gesontheit ende krancheit, huysen ende woenen, heffen ende draeghen ende alderley by bestellen al wat ein krancke ofte swaecke persoen in haere noet van duen heft, ende vortz in allen ende van allen guet te duen wie sich dat eicht ende gebuert, alsoe dat Jan vurss daer van die ehr heft ende Mercken die baet.

Ende aengesien opten 27 marty inden selven maent ende jaer, dat die erfgenaemen ofte wider party gesien ende gehoert hebben dat die donatioon oder gifte gerichtelicken voer schepen ende richter boedt gepassiert ende aef gedaen wass, soe hebben die vurss partien tsemender hant, nemlick Tonis Verlinden ende Wilmken syn huisfrou, Bheer Verlinden ende Gaertien syn huisfrou, Nielisken vanden Cuilen ende Peetghen syn huisfrou, met sinen kinderen Gys ende Nael syn huisfrou, Lysken ende Metghen, ende tsamender hant in ein fruntlich verdraech oder vercoipingh dess vurss guetz getreghen met bewilgungh van Jannen vurss. Ende aengesien dat die vurss partyen die selvighe gift van werden ende voer guet gehalden hebben, daer over dat die muen Mercken ghein reynungh en behoeft te duen, ende dess ganss ende geheel untslaeghen, soe isset dat obgl partyen ten beyden syden ten overstaen van guede arbiteren geaccordiert ende gesloeten syn met hant ende palm slaech, dat Jan vurss den vurss partyen dat gehele erff vercocht hefft, dat selvighe hem gegeven is van siner muenen Mercken vurss, soe dat die selvighe erfgenaemen Jannen vurss geloeft hebben toe geven ende wael te betaelen die somma van twe duisen dry hondert gl, ein ieder gl ad 20 st Ruremunsche werungh van penninghen. Die selvighe vervallen sullen syn nhae doetlicken aefganck van Mercken vurss ofte by aeff treckinghe van Jannen vurss. Wie dan versproecken is dat Mercken voer Paessen aef livich wordt, soe sael Jan vurss even wael alle landerien beseyen ende behalden; ende wen sy nhae Paessen storf, soe sael Jan vurss die landery nach ein jaer beseyen ende dan op Paessen aef toe trecken.

It[em] ist oick claer versproecken dat Jan vurss niet aef trecken en sael ehr ende hy beforens die voergl twe duisent dry hondert gl sullen ierst tot danck vernuecht ende betaelt syn, anders soe isset dat Tonis, Bheer ende Nielisken mit sinen kinderen setten ende stellen Jannen vurss tot ein wittelicke borch ende underpant ein ieder besonder alle haere erff grunt, stockguederen, huys ende hoff, lant ende sant, vortz gereit ende ungereit, hebbende ende verkrigende, wie dan die selvighe guederen inden kerspel van Helden ahen den Paninghen geleghen in haeren voeren ende palen, nergens van vuyt gescheiden. Ende doer gebrecks halven van gueder betaelinghen der vurgl hoeft summa, sael Jan vurss ofte sine rechte erven die vurgl underpandt gerichtelicken om slaen ende vercoipen tot der voller betaelinghe toe, gelyck scholt die met allen rechten vervolcht ende vuyt gewonnen wheren ende met gheinen rechten daer teghen te duen. Waer op Jan vurss rechte vertichtenis gedaen heft met hant, halm ende munt ende is des alsoe ganss ende geheel vuytgegaen. Ende die coiperen dess vurss guetz met haere adherenten daer in gesat ende gestalt, geërft ende geguet, allet nhae den gewoenlicken lant- ende banckrechten volghens der Reformatioen. Wael verstaende dat die vurss ervingh ende guedingh plaetz hebben sael nhae doetelicken aefganck van Mercken vurss, ende ehrder niet. Ende hebben alsoe obgl vercoiper ende coiperen ende haere consorten die eine den anderen beloeft ghein inspringh, jedren ungerechticheit, aenforderingh, toespraeck daer toe oder daer nhae nimmher mheer enich suecken sullen hebben ofte vinden ende bij alre punten ende articulen vurss beloven in allen ende van allen vast stede bundich unwider ruepelicken te halden, ende in geinerley manieren met enighen rechten daer teghen te duen, voerbehalden unsen Gen[aedigen] Furst unde Lant heer unde ein ieder sines gueden rechts. Sonder alle arch ende list, alle loese erdachte funden vuyt gescheiden. Des in waerher getuichenis soe hebben wir vurss schepen ter konden unser eighen secreet schependombs siegel hy under ende ahen duen hangen. Gegeven inden jaere unss heren 1632 den 3 aprillis