| | - Huwelijksvoorwaarden Hencken Smollers X Merrycken Janssen.
-
- Inden naeme der H Dryvuldicheyt Amen. Kundt ende kenlich sey een jeder menlich openbaer soe wey dese tegenwoordighe houwelickx voorwaerdt hoert, sien lesen oder voorkoemen werdt, als dat op huyden dato underschreven is een houwelyck getractiert ende gemaeckt tusschen die eersaeme Hencken Smollers als brudegom ende Merrycken Janssen als bruydt; alles ter eeren Goedes ende hunder beyder seelen salicheyt, ende dat by alle dese naervolgende puncten ende articulen als volghen weerdt. Alles geschyet ter presentiën des Eerw. H. Pastoer Michael Roefs ende ten beyden sits vrunden ende maeghen, hyer vrintelyck toe geroepen ende gebeden. Soe is inden iersten claerlyck versproicken ende geconditioneert ter beyden syden dat alle die goedern die staender eehe gewonnen ende geworven werden, sullen by aeffsterven der eeheluyden d'een voor den anderen des eersten geboerden tweesydich vallen, waerby hyer beneffens claerlyck ooeck is versproicken ende geconditionneert tusschen denen eeluyden voorss, soe't gebuerden dat sy eeluyden den eenen voor den anderen aeflivich wordt sonder ennige wettelycke geboertten, als dan sael den lestlevenden vanden aefflyvighen genietten, hebben ende behalden die somma van vier hondert gulden, ende alsdan aeffstandt toe doen vandes aefflyvighens goederen soe gereyde als ungereyde, geene daervan vuytgescheyden; dat als oeck die guederen die den eenen voor den anderen voor dato hebben gehatt, ende oyck aenkoemen mucht van haer patrymoniael, sonder die gewonnen ende geworven goederen als voorss staet. Ter warer oircunde van dese teghenwordighe houwelix voorwaerde voorss soo syn hyer toe gebeden ende geroepen inden iersten den Eerw. H. Pastor voorss. Daer beneffens ten beyden syts vrunden ende partyen. Item aen zyden den brudegom Henrick Smollers des brudegoms vader, Lennart Smollers schepen ende Peter Goemans, ende aen zyden der bruydt Henrick Janssen, Willem Janssen, Christianis haer broeders. Geschyet ende gemaeckt inden jaire ons Heeren Jesu Christi eenduysent ses hondert vierenveertich, den dryentwintichsten daegh van novembris.
| |