Inden naeme Godes ende der heyligher Dryvuldicheyt Amen. Cundt ende kenlich sey een jeder menlich openbaer soo wey dit tegenwordich instrument van houwelix voorwaerdt hoert, sien lesen oder voorkoemen weerdt, als op huyden dato den lesten daegh Aprilis Anno een duysent ses^C sevenundartich is opgericht bij goede vrunden, maeghen ende partyen, ende Dirick Hesen ende Lenaert Smullers schepen onderschreven, tusschen die eersaeme Claes Claessen als bruydegom ende Beatrix Matis als bruydtt, allet tot der eeren Godes ende hunder beyder seelen salicheyt, by dese naervolgende articulen als volght: Inden eersten soo isset versproecken ende veraccordeert tusschen hun eeluyden voorss, also sy eeluyden ten beyts sydts voorkinderen hebben, soo wanneer het gebeurden dat van hunder beyde eeluyden een aefflivich woordt, alsdan sullen die voorkinder van den eersten aefflivighen alle gereyde goederen metten lestlevenden gelyck deylen. Ende want hett geviell dat sy eeluyden ennige lyffserven kregen toesaemen, dan sullen die naekinder den voorkinderen het halff gereyde moegen aeffdeylen, waer by die voorkinder den naekinderen nach sullen vuytter hant geven die somma van een hondaert gulden; Claessen kint vyftich ende Baetghens kinder vyftich. Wyders is geconditionneert ende versproecken, soo Baetgen opgebeurt heeft die somma van vyftich dallers, de welcke Baetgens voorkinder naer aefflyvicheyt van heur moeder wederom voervuyt sullen hebben van Claessen, ofte hy den lestlevenden waer, ofte van synen voorkindt Lennarden, van hunnen deyle alleen aeffgaende, ofte des kindts deyll. Wyders is geconditionneert ende versproecken dat Baetghen synen voorkinder vuytten gereyden geven saell als zy sich bestaeden acht paer slaeplaecken bastarts, daeronder een paer vlessen moetten zyn, ende twee stucken doeckx ende twee dweelen. Ende hiertegens sael Claessen voorkindt hebben vuytten gereyden van Claessen wegen vier stucken doeckx en een dweyl wanneer het kindt dieselften mucht van doen hebben. Item Baetghens twee dochters Wilmken ende Ingelken sullen jeder een bedde hebben, met jeder een paer slaeplaeckens, een saerts ende een paer kussen, daertoe oeck een jeder een coey wanneer sy sich ten houwelyck begeven. Dit selften sullen sy naederhant wederom inde gelycke deylinge bringhen, sonder die koyen niet. Wyders is geconditionnneert dat Baetgens jonghste soon Hencken sael hebben een bedde, soo hem gegeven is van synder suster salg^r Hencken, dit en sael naederhant niet ingebracht woorden. Wyders is versproecken dat Baetghens voorsoon Peter sich bestaeden, dan sullen Claes ende Baetghen hem met geven drie malder roggen ende een malder boeckweyts. Desgelix sael Claessen kindt Lenaert oeck hebben, als sich het selften bestaet. Wyders is versproecken wanneer het gebuerden dat die voorkinderen van Baetghen sich bestaeden, dan sael jeder kindt hebben die somma van hondaert dallers van alsulcken penningen soo Baetghen met Gyssen saliger vuytgesadt hebben toesaemen, off hun van hunnen alders naergelaten. Item woort voorbehalden dat Claess geen holt houwen en sael op Neessen erff ten ware hy tselften van doen mucht hebben toe vertimmeren aen ennich gebouw, oft daer van toe maecken, maer geen daer van toe vercopen om het goet daer met toe Vbloten. Item is geconditionneert ende versproecken dat alle scholt soo gereyde als ongereyde soo zy eeluyden schuldich syn ten beyts syts, die selvige sullen sy eeluyden oick gelyck betaelen. Ende want van d'een syde meer betaelt woordt als d'ander, dat selften sullen die voorkinderen die meerrest ofte superplus goet doen, waer met dese conditionis syn eyndende. Des ter warer oirkundt syn hy over ende aen geweest als vrunden ende maeckxmannen ten syden des bruydegom Gaert Claessen ende Peter Neessen, ende ter syden vande bruydt Peter Jaecken ende Gys Cuypers. Daer beneffens Dirick Heesen ende Lenaert Smullers, schepenen. Ende hebben dese houwelix voorwaert beneffens maeckxmannen tot meerder confermatie op spatum deses onderteyckent. Actum ut supra.