Inden naeme Goedts Amen. Cundt ende kenlyck sey een jeder menlich openbaer soo wey dit tegenwoordich document van testament hoert, sien leesen oder voorkoemmen weerdtt, als dat op huyden dato den VIIII july 1636 is opgericht Grytgen Brumments, weesende kranck van lichaem ende vermaent synde van de Goedts gaeff, doch by goeder memoriën ende verstande, bedinckende de swaeckicheyt des des minselycken geslachs ende die seeckerheyt des doets ende die onseckerheyt die uure des selften, ende heeft der weegen haeren vuyttersten will ende testament gemaeckt in vuyegen ende manieren als hier naer volght: Item inden eersten heeft sy testatrice gewilt ende begeert soo wanneer haer seell ende lichaem gescheyden muchten syn, bevyelt haer seell Godtt almachtich ende hett lichaem der gewyder eerden tott Helden. Ende verners tot haere tytelycke goederen koemende, om daer van thoo disponieren naer haeren egen well gevallen, gelyck zy dooet in craft deses, inden eersten gyeft ende maeckt zy testatrice der kercken ende Ermmen tott Helden een jeder thyen gl. Verners gyeft ende maeckt zy testatrice haeren eeman Gaertten der Schroir die somma van twee hondaert guldens op haer erfftaell. Wyders gyeft ende maeckt zy testatrice haer halve gesusters ende gebroeders oeck de somma van twee hondaert gulden, oick op alle haere erfftaell Vs. (in de marge: toe weten naer doetlycken aeffganck van Gaerten Vs als dan aen toe vanghen). Waer mett sy testatrice haere depositie is concluderende. Dit alles geschyet ter presentiën van naebuer getuygen Dirick Goemans ende Frans der Kremer, die desen inhalt van testament binnen behoorlycken tyt aen schepennen Geradt Verhaegh ende Lenaert Smullers hebben overgebracht. Ende hebben desen inhalt van testament mett eygenaer hant opt spatium deses onderteyckent. Actum als boeven.

Gerit Verhaeg

Lenaert Smullers

WvKnippenbergh, Vice-secretaris