| Testament van Jencken Verstappen. Op huyden den XXIIIIen aprilis Anno 1636 Jencken In Verstappen, vermaent synde ende kranck synde van lichaem ende mit die Godtsgaeff belaeden synde, edoch by goeder memoriën ende vollen verstande, bedinckende de swaeckicheyt des minselycken geslachts ende die seeckerheyt des doots ende die onseeckerheyt die uhure des selften, heeft der weegen van syne tytelycken goederen willen disponeeren ende testament toe maecken naer synen eygen believen ende well gevallen. Inden eersten heeft hy testateur gewilt soo wanneer syn syel ende lichaem gescheyden muchten syn, bevyelt zyn syell Godtt almechtich ende hett licham den gewyden kerckhoff tot Helden. Verners aen syne tytelycke goederen koemende heeft hy testateur gegeven ende gemaeckt, gelyck hy gyeft ende maeckt craft deses, met wille ende consent synder huysfrouwen Hennersken, aen die Ermmen ende kercke tot Helden een seecker somma van penninghen, staende aen Lenaert Kremers. Wyders gyeft ende maeckt hy testateur Willem van Hoff ende Hencken eeluyden, die halffsuster van hem testateur vs, die somma van tweehondart ende vyffendartich gulden, staende aen Jacob Grauwen, weell verstaende dat Hennersken syns testateurs huysfrouw die vs penninghen int geheell saell gebruycken den tyt haers levens. Ende naer dootlycken aeffganck van Hennersken vs soo sullen die vs penningen succedeeren daerse aen gegeven zyn; waer mede dat hy testateur syne depositie is concluderende. Dit alles geschyet ter presentiën van getuyghen Jan Seetsen ende Jan Stercken als naeburen, die desen inhalt binnen behoirlycken tyt aen Gerat Verhaegh ende Lenaert Smullers hebben overgebracht. Ende hebben wy schepenen Vs dit testament mit eygenaer hantt, om onsse geburlycke gerechticheyt, opt spatum deses onderteyckent. Actum ut supraGerit VerhaegLenaert SmullersWvKnippenbergh, vice-secretaris |