Jacques Rutten;     Nr 15.    (RAL; Schepenbank Helden, inv. nr. 25 folio 39 r)

tekst in blauw geeft links aan naar onderliggende bladzijden


 
Testament van Peter Roosen.
 
Inden naeme Godes ende der H. Drivuldicheyt Amen. Cundt ende kenlyck sie een jeder menlich openbaer soo wie dit tegenwoordich document van testament hoort, sien lesen, oder voorkoemen wierdt, als dat op huyden den XVIIIIen february ao 1636 is opgericht in manieren gelyck volghen wierdt, Peter Roosen, tot syne woonsteede versocht synde pastoor en getuyghen, allwaer denselvigen is cranck van lichaem bevonden, doch by goeder memoriën ende verstande wesende, liggende onder de sacramenten der H. Kercken, bedinckende die swaeckicheyt des minselycken geslaechs ende die seeckerheyt des doots ende die onseckerheyt die uure des selften, ende heeft van syne tytelycke guederen willen disponeren gelyck hy doet hy met ende in kraft deses. Ende eerstelycken heeft hy, testateur gewilt soe wanneer syn syell ende licham gescheyden mucht syn, syn syell Godt almachtich ende het licham den gewyden kerchoff tot Helden.Wyders gyeft ende maeckt hy testateur der kercken tot Helden ad XXV gl. Insgelycken den Ermmen XXV gl. Daer beneffens gyeft hy testateur vuyt gronts synts hertten aen Jencken Roosen synen broeder alle syne gereyde guederen, wes hy testateur ergens heeft; daeren teghens dat Jencken Vs alle gereyde schulden synes testateurs wegen aen sich saell behalden ende betaelen. Wyders gyeft ende maeckt hy testateur aen Jencken zynen broder vs op alle syne erffgrontt stock guederen die somma van vyfthyen hondaert guldens. Waer mede testateur hy testateur syne depositie is concluderende. Ende verclaert dit synen vuyttersten will toe zyn, twelck hy begeert naer synen doot geobserviert toe hebben. Dit alles geschyet in presentie des H. Pastoer Michael Roefs ende getuyghen Jacob Grauwen, Tilman vanden Berghe, die desen inhalt van testament binnen behoorlycke tyt aen schepen Gerat Verhaegh ende Lenaert Smullers hebben overgebracht, opten XXen dito. En hebben dit tegenwoordich document van testament tot conformatie mit eygenaer hantt opt spatum deses onderteyckent. Actum ut supra
Gerit Verhaeg
 
Lenaert Smullers
 
WvKnippenbergh, vice-secretaris