HISTORISCHE WERKGROEP LAND VAN K

*[ Door op de foto te klikken krijgt u een vergroting ]*

	[Blad 1 voorzijde] Kessell de (14)39 ad (14)40 Kessel

	[Blad 1 rugzijde]

	[Blad 2 voorzijde] Dit is rekenynge ind bewisinge mijns Johans van Broichusen here tot Loe ind to Geysteren, erffhaeffmeister etc., amptman tslants van Kessell ind ter Horst, van allen upboeren ende uytgeven dat ick van wegen mijns lieven gnedigen heren van Gelre ende van Gulick ende greve van Zutphen upgeboirt ende uytgegeven hebbe, angaende op Sente Margaretendach in den jaeren Ons Heren 1439 ende uytgaende op Sente Margaretendach in den jaeren Ons Heren 1400 ende veertich Primo van den renthen van der Horst Item van pacht van der joffrouwen van der Horst geboirt 5 vaet roggen Item van Eygemans kynderen 3 malder 3 vaet roggen Item van den badeampt 3 malder rogghen Item van Jacop Messen een malder rogghen Item van den pacht to Berchem 10 malder rogghen Item van der molenen ter Horst geboirt 89 malder rogghen Summa 107 malder 2 vaet Item van bevele mijns gnedigen heren Johan Block gedaen 6 malder roggen, soe blijfft des roggen noch 101 malder 2 vaet Item op Sente Andryesdach hebbe ick des roggen doin vercoepen 35 malder ende hebbe voir ellick malder geboirt 2 gulden, maect 70 gulden, den gulden gerekent ad 20 clymmer ende den clymmer 13 groet, ende soe voirt dese rekenschap uyt Item op Onser Liever Vrouwenavont Annuntiationis hebbe ick des rogghen doin vercoepen 40 malder ende hebbe voir ellick malder geboirt 2 gulden 2 clymmer, maect 84 gulden Item op Sente Kylyaensdach hebbe ick den anderen rogge des bleeff 26 malder 2 vaet voirt doin vercoepen ende hebbe voir ellick malder geboirt 2 gulden 8 clymmer; maect 63 gulden 4 clymmer Summa an gelde van rogghen geboirt 217 gulden 4 clymmer

	[Blad 2 rugzijde] Upboeren van malt ende van evenen Item van den molenen 26 malder malts ende hebbe van ellick malder geboirt 1 gulden 10 clymmer, maect 38 gulden Item van pacht geboirt 1 malder 5 vaet evenen Item tot Oerle van wey evenen geboirt 3 malder evenen, te samen 4 malder vijff vaet, ind hebbe voir ellick malder geboirt 15 clymmer, maect 3 gulden 12 clymmer 6½ groet Item van der olymoelen geboirt 2 gulden 15 clymmer Item van tynse geboirt 15 gulden Item van den ketell ende assysen te samen geboirt 20 gulden Item van enen ponde wass geboirt 2 clymmer Upboeren van capoenen ende van hoenren Item 52½ capoen die 10 gerekent ad 1 gulden; maect 5 gulden 5 clymmer Item 42 hoenre ende van Zwolgen 12 weyhoenre te samen 54 hoenren die 10? gerekent ad 1 gulden maect 2 gulden 14 clymmer Upboeren van gewynne ende van broecken Item van der joffrouwen van der Horst van gewynne geboirt 4 gulden gulden 14 clymmer Item van Tijs Clerck van gewynne geboirt 6 gulden Item van Herman van Meyell van enen hantwissell geboirt 2 gulden Item van Jan Bruecker van gewynne geboirt 6 gulden 12 clymmer Item van Jenken van Eykenenbosch van gewynne geboirt 2 gulden 7 clymmer Item van Gerit van Reyssenbeeck van gewynne geboirt 1 gulden Item van Jans knaep van der Hage van gewynne geboirt 1 gulden 10 clymmer Item van Eygemans kynderen dat sij voir den gericht van hon keerden geboirt 1 gulden Summa 138 gulden 11 clymmer 6½ groet (Het totaal klopt niet; ik tel volgens de getransscribeerde getallen 108 gl, 91 clymmer 6½ groet, dus 112 gulden, 11 clymer en 6½ groet)

	[Blad 3 voorzijde] Upboeren in den lande van Kessell In den yersten Kessell ende Helden Item van Drabben van dingtalen geboirt 1 broeck, maect 2 gulden 1 clymmer 6½ groet Item van Jenken baede twe broecken van dingtalen, maect 4 gulden 3 clymmer Item van Wynken Heynkens soin dat hij enen man gedreycht hadde van yffenyngen bij raet der schepenen geboirt 7 gulden Item van Heynen Wolffs van gewynne geboirt 4 gulden 10 clymmer Item van Geerken Hannen van gewynne geboirt 7 gulden Item van Jan Wijnants van gewynne geboirt 2 gulden 10 clymmer Item van enen wedde die tegen Koesdonck gedaen waert geboirt 12 gulden 7 clymmer Item van jonghen gesellen die enen man bij enen wijve ophieffen, geboirt enen broeck, 2 gulden 1 clymmer 6½ groet Item Heyn Wolffs ende sijn soene van gevechte 3 broecken, 6 gulden 4 clymmer 6½ groet Item van enen snoeden gevonden ymme geboirt 6 clymmer Item van Jan Coesdonck van dingtalen enen broeck, 2 gulden 1 clymmer 6½ groet Item van Leetgen Smeets van dingtalen twe broeken, maect 4 gulden 3 clymmer Item van Hont Box van dingtalen twe broecken, maect 4 gulden 3 clymmer Summa 58 gulden 11 clymmer

	[Blad 3 rugzijde] Baerle ende Brede Item van Hen Wynkens van gewynne 3 gulden 10 clymmer Item van Willem Otkens van nyen tynse van twe jaeren geboirt 2 alde moerken, maect 6½ groet Item noch tot Baerle van nyen tynse geboirt 4 alde maerken, maect 1 clymmer Summa 3 gulden 11 clymmer 6½ groet Blederick Item van Maes van Helden dat hij de schepenen sinen medegesellen nyet gevolchelick en was. Van yffenyngen bij raet der schepenen geboirt 112 gulden 2 clymmer Summa per se Zevenhem Item van Merten Knijp van gewynne geboirt 8 gulden Item van Jenken van der Vergert van gewynne geboirt 9 gulden 2 clymmer Item Gaertken van der Porten van gevechte enen broeck, 2 gulden 1 clymmer 6½ groet Item Willem van Dijck van dingtalen enen broick, 2 gulden 1 clymmer 6½ groet Item Willemken Symons van gevecht enen broeck, 2 gulden 1 clymmer 6½ groet Item Gaedert van Ullft van dingtalen enen broeck, 2 gulden 1 clymmer 6½ groet Item Gijsken van Oerde van dingtalen enen broeck, 2 gulden 1 clymmer 6½ groet Summa 27 gulden 9 clymmer 6½ groet

	[Blad 4 voorzijde] Zwolgen nyet geboirt Lotthem ende Wanssem Item an der abdissen reynten van Nuys geboirt 1 gulden Item van Zeger Huynbert van erfftalen geboirt enen broeck 2 gulden 1 clymmer 6½ groet Item van enen wijve uyt Brabant van dingtalen enen broeck 2 gulden 1 clymmer 6½ groet Item van Jenken Roesken van dingtalen enen broeck 2 gulden 1 clymmer 6½ groet Item van Jenken Tijs voir enen broeck geboirt 2 gulden 1 clymmer 6½ groet Summa 9 gulden 6 clymmer Raede Item van Rutten Schomeckers guede ende van Katrinen Snelkens huyse bij raet der schepenen geboirt 85 gulden 10 clymmer Item van gewynne dat die schepenen gewoenlick sijn te setten geboirt 11 gulden 8 clymmer Summa 96 gulden 18 clymmer Summa omnia receptoris 663 gulden 13 clymmer 6½ groet vz 349 ryns gulden 11½ stuver

	[Blad 4 rugzijde] Dit is uytgheven mijns Johans van Broichusen here tot Loe ind to Geysteren, erffhaeffmeister etc. dat ick van wegen mijns lieven gnedigen heren van Gelre ende van Gulick etc. uytgegeven hebbe bynnen deser voirs tijt Item beheltelyck mij mijns amptbrieffs bleeff mij mijn gnedige here yn mijnre lester rekenyngen schuldich seventhienhondert 88 rijns gulden 8 clymmer 10 groet ende mijn gnedige here gheefft mij jaerlix van mijnen ampt te verwaeren ende van des huisgehalts wegen ter Horst 290 rijns gulden 16 alde tuyne. Maect te samen twe dusent 78 rijns gulden enen Arnhemse gulden 12 clymmer 10 groeten Summa per se Item voir mijnen brant 14 gulden Item den porter voir sijn loen 6 gulden Item den molner voir sijn loen 6 gulden 10 clymmer Item voir heckscheyen gegheven 16 clymmer Item 23 ellen zeylduecks die elle ad 2 clymmer, maect 2 gulden 6 clymmer Item voir lijnen totten zeylen gegheven 13 clymmer Item van myspelboemenholt totten kammen ende staven opten molenen gegheven 1 gulden Item 4 graver die an den archen groeven 4 dage in den werck, hadden ellick des dages an kost 3 clymmer, maect 2 gulden 8 clymmer Item soe hebbe ic mij yn mijnre lester rekenyngen mysrekent 6 malder rogghen die ick Johan Block gedaen hadde, ende vercocht waren, ellick malder voir 3 gulden 16 clymmer nae uytwisinge der rekenyngen, maect te samen 22 gulden 16 clymmer Summa 56 gulden 9 clymmer

	[Blad 5 voorzijde] Item hadde mij mijn gnedige here doin schriven des donnesdaghs nae Sente Petersdach ad Vincula ten avonde tot Lobede te wesen myt mijnen reke nyngen. Reet aldaer ende was daer enen dach ende nacht myt 12 peerden, verteerde mytter avervaert tsamen 16 gulden Item was ic gereden tot Goch ende dedingde aldaer voir mijns heren gnaden mytten mennen van Raede ind hadde myt mij Johan van Goer. Was daer 3 nacht myt 16 peerden, verteerde 58 gulden 18 clymmer Ende ter selver tijt hadde ick heren Roilman ende meer gueder manne oick aldaer, der teringe ick mijnen gnedigen heren nyet en rekene Item daer nae doe men dedingde omme der heiden wille voir Goch verschiede die marschalk mij ende die schepenen van Raede daer bynnen Goch te komen. Was daer twe nacht myt 10 peerden, verteerde 24 gulden 14 clymmer Item des dinsdages nae Sente Matheusdach schreeff die mairschalk heren Roylman tot Goch bij mijnen gnedigen heren to komen ende dat ick myt queme. Reet aldaer, was uyt twe nacht myt 8 peerden; verteerde 19 gulden Item op Sente Dyonysdach was ic gereden tot Goch ende dedingde myt mijnen gnedigen heren van mijnre ampten wegen. Was aldaer 3 nacht myt 8 peerden, verteerde 23 gulden 12 clymmer Item des sonnendages nae Sente Ceciliendach enen baede van Gelre gesant ten Bosch omme der gebrueder wille van der Hatert die yn mijnen ampt roeffden ende branden uyter Meyerijen van den Bosch ende weder daer ynne. Den to teergelde gegheven 10 clymmer Item hadde mij geschreven die stad van den Bosch des frijdages nae Sente Katrinendach enen aldaer to schicken, die schaden op to doin, die uyter Meyerijen yn mijnen ampt geschiet waren. Sande Jacop Schriver aldaer ende was uyt vijff nacht. Verteerde 3 gulden Summa 145 gulden 14 clymmer

	[Blad 5 rugzijde] Item hadde mij mijn gnedige here doin schriven des neesten daghes nae Sente Johansdach Baptist ten avonde tot Nymegen te wesen. Reet aldaer ende was daer 8 nacht myt 5 peerden, veerteerde myt avervaren 42 gulden 10 clymmer Item hadde mij mijn gnedige here doin schriven des neesten manendages nae Sente Kylianusdage ten avonde tot Gelre te wesen. Reet aldaer ende was daer twe nacht myt 12 peerden, verteerde 19 gulden Uytgeven an bouwe en tymmeringen Item Gijsken ende Jan van Weert tymmerlude 15 dage in den werck. Holt totten bruggen affgehouwen ende beslagen. Hebben enen nyen paell onder der brugghen aen die moelen ynne geheyet. Hebben aen den archen gestopt die averste ende nederste bruggen an den huyse beyde nye gelacht ende geplenct, enen nyen balck ende paell onder die nederste brugge gemaect. Hebben den molensteyn opter wyntmoelen verlacht, twe nye kameren een baven die koecken ende een baeven der poerten gescheert, ende nye ribben baeven die koecken gelacht hebben ende ander cleyn werck gemaect hebben. Hadden ellick des dages te loon 3 clymmer ende an kost 3 clymmer, maect 9 gulden Summa 70 gulden 10 clymmer

	[Blad 6 voorzijde] Item hier toe verdaen an ijseren werck. In den yersten 250½ veerdell lassnagell, 100 spijkernagell an die vloerarch ende totten brugghen, costen te samen 1 gulden 11 clymmer 3½ groet Item die spille gesteelt yn die watermoelen 2½ veerdell spijkernagell an die olymoelen ende watermoelen, costen 5 clymmer Item vijff schonen an die olymoelen, costen 10 clymmer Item een panne ende enen tochbant an die averste brugge, costen 4 clymmer Item vijff lasnagell ende enen bant op die wyntmoelen costen 2 clymmer Item dat molenijseren gezweert, cost vijff clymmer Item ½ veerdell hecknagell, cost 5 groet Item 200 staecknagell baeven die koecken ende opter porten verdaen, costen 5 clymmer Item twe emer opter averster brugghen gebonden myt alden benden, cost 3 clymmer Item noch baeven die koecken 450½ veerdell staecknagell ende een ghe henge an een doer, costen te samen 13 clymmer 6½ groet Item twe holtsnyder twe dage in den werck die heckscheiden ende ander cleyn holt sneden, hadden ellick des dages te loen 5 clymmer ende ellick des dages an kost 3 clymmer, maect 1 gulden 12 clymmer Item die selve holtsnider noch gesneden totten bruggen 500 voet plancken, dat hondert verdingt in hoeren cost voir 8 clymmer, maect 2 gulden Item voir zolreribben totten kameren baeven die koecken gegeven 3 gulden 4 clymmer Summa 10 gulden 15 clymmer 2 groeten

	[Blad 6 rugzijde] Item 100 estrix totter gaeten yn die koecken verlacht, costen mytten verleggen 3 gulden 4 clymmer ende an kost 3 clymmer, maect 3 gulden 7 clymmer Item twe leyendecker 1 dach opten huyse gestopt. Hadden ellick des dages te loen vijff clymmer ende an kost 3 clymmer, maect 16 clymmer Item hier toe verdaen nagell voir 3 clymmer Item twe knecht 6 dage in den werck, die kameren baven die koecken ende opter porten baeven averschindelt, ende die wende nye ghe staeckt ende geleymt hebben, hadden beide te loen des dages vijff clymmer ind an kost 6 clymmer, maect 3 gulden 6 clymmer Item Gaedert Decker acht dage in de werck die een sijde van der porten nye gedeckt heefft, den stall die schure backhuys ende torffschop ende die averste heymelicheit gestopt heefft. Hadde ellix dages te loen 5 clymmer ende des dages an kost 3 clymmer, maect 3 gulden 4 clymmer Item enen operknecht die hem diende hadde ellix dages te loen 2 clymmer 6½ groeten ende des dages an kost 3 clymmer, maect 2 gulden 4 clymmer Item noch een operknecht die hem 4 dage opter porten diende hadde an kost des dages 3 clymmer, maect 12 clymmer Item hier toe verdaen 12 vymmen schoeve, die vymme ad 10 clymmer, maect 6 gulden Summa 19 gulden 12 clymmer

	[Blad 7 voorzijde] Item hier toe gehadt 200 latten, costen dat hondert 3 gulden 16 clymmer, maect 7 gulden 12 clymmer Item hier toe oick gehadt weertrijs voir 1 gulden Item Johan Budell van den sesshondert Arnhemse gulden daer die mairschalk myt van mijns gnedigen heren wegen voir steet gegeven 22 rijns gulden, den gulden gerekent ad 1 Arnhemse gulden 18 clymmer. Maect 41 Arnhemse gulden 16 clymmer Summa 50 gulden 8 clymmer Similiter expositoris 2078 ryns gulden ende 355 arnhemse gulden 12 groet. Die arnhemse gulden maken 186 ryns gulden 32 kromstert 12 groet vz similiter 2274 ryns gulden 32 kromstert 12 groet Item noch een peert gerekent voir 45 ryns gulden

	[Blad 7 rugzijde] (vertikaal staat hier:) Rekeninge Johan van Broichusen (horizontaal staat:) Domino mei 1925 Arnhemse gulden 21 clymmer 5½ groet ende een peert ad 45 ryns gulden